கரிச்சான் குஞ்சு நூற்றாண்டு 1919 - 2019
சிறப்புப் பகுதி
பொருநை பக்கங்கள்
கரிச்சான் குஞ்சு நூற்றாண்டு
1919 - 2019
கரிச்சான் குஞ்சு என்று அழைக்கப்பட்ட ஆர். நாராயணசாமி 10.7.1919இல் தஞ்சை மாவட்டம் நன்னிலம் வட்டம் சேதனீபுரத்தில் பிறந்தவர். 1940இல் ‘ஏகாந்தி’ என்ற புனைபெயரில் முதல் சிறுகதையான ‘மலர்ச்சி’ கலைமகளில் வெளிவந்தது.
கு.ப.ராவோடு நெருங்கிய உறவுகொண்டிருந்தவர். ‘கரிச்சான்’ என்ற புனைபெயரில் எழுதிவந்த கு.ப.ரா. மீது கொண்ட அன்பினால் ‘கரிச்சான் குஞ்சு’ என்ற புனைபெயரில் எழுதலானார்.
பெங்களூரில் வடமொழி, வேதம் பயின்றார். மதுரை - ராமேஸ்வர தேவஸ்தானப் பாடசாலையில் தமிழும் வடமொழியும் கற்றார். சென்னை, மன்னார்குடி, கும்பகோணம் முதலான ஊர்களில் தமிழாசிரியராகப் பணியாற்றினார்.
160க்கும் மேற்பட்ட சிறுகதைகளை எழுதியுள்ளார். சுமார் பத்து சிறுகதைத் தொகுதிகள் வெளிவந்துள்ளன. இவர் எழுதிய ஒரே நாவல் ‘பசித்த மானிடம்’ (1978). இரு குறுநாவல்கள் நூல்வடிவம் பெற்றுள்ளன. இரு நாடகத் தொகுதிகளை (1989) எழுதியுள்ளார். இவர் சமஸ்கிருதம், ஆங்கிலம், இந்தி மொழிகளிலிருந்து சில முக்கிய நூல்களைத் தமிழுக்கும் தமிழிலிருந்து சமஸ்கிருதம், ஆங்கிலத்துக்கும் மொழிபெயர்த்துள்ளார்.
பெற்றோர் ராமாமிருத சாஸ்திரி - ஈஸ்வரியம்மாள். முதல் மனைவி வாலாம்பாள் இறந்ததும் சாரதாவை மணந்தார். இவருக்கு நான்கு மகள்கள் - லக்ஷ்மி பேபி, பிரபா, விஜயா, சாந்தா. 1992ஆம் ஆண்டு மறைந்தார்.
கதை, கட்டுரை, மொழியாக்கங்கள் வாயிலாகத் தலைசிறந்த எழுத்தாளர்கள் தமிழுக்குச் செய்திருக்கும் இலக்கியப் பங்களிப்புகள் ஏராளம். இவற்றில் பலவும் பெருந்திரட்டுகளாகவும் நூல்களாகவும் வந்துள்ளன. பெரிய தொகுப்புகளை வாசிக்க நேரமில்லாத, நூல்களைத் தேட அவகாசமில்லாதவர்களுக்கு மகத்தான படைப்புகளை எளிமையாகவும் சுருக்கமாகவும் அறிமுகப்படுத்துவதே இந்தப் பகுதியின் நோக்கம். இலக்கிய ஆர்வலர்களான நண்பர்கள் சிலரின் முயற்சி ‘பொருநை’. காலாண்டுக்கொருமுறை செவ்விலக்கியத்தை முன்வைப்பது ‘பொருநை’யின் விருப்பம்.
மூத்த தலைமுறை எழுத்தாளரான கரிச்சான் குஞ்சு இம்முறை இப்பகுதியில் அறிமுகப்படுத்தப்படுகிறார். இது பதினாறு பக்கங்களில் பரிமாறப்படும் சிறு விருந்து. இது புதிய தலைமுறைக்கு ஆரம்பம்; மூத்த தலைமுறைக்குப் பின்காணல்.
‘யாம் பெற்ற இன்பம் பெறுக இவ்வையகமே’ என்பது ‘பொருநை’யின் குறிக்கோள்.
சிறப்புப் பகுதி
ஒருங்கிணைப்பு: அரவிந்தன்
பங்களிப்பு: ரவிசுப்பிரமணியன்
கல்யாணராமன்
ராணிதிலக்
தனசேகர்