விடிகாலையில்
மலையாளத்திலிருந்து தமிழில்: சுஜா
விடிகாலையில்
இடது கையில்
சூரியனைத் தூக்கிப் பிடித்து
வலது கை வெட்டுக்கத்தியால்
நடுவில் ஓங்கி வெட்டி
இரண்டு துண்டுகளாக்கி
அதில் ஒரு துண்டை எடுத்துத்
துருவத் தொடங்கினாள்.
கீழே உள்ள தட்டில்
உதிர்ந்து விழுந்துகொண்டிருக்கிறது
வெளிச்சம்.
இறுக
சட்டென்று வீசிய
பலத்த காற்று
பெருமரத்தைச்
சுற்றிச் சுழற்றியது.
மரம்
சர்வசக்தியையும் திரட்டிப்
பறவைக் கூட்டை
இறுகப் பற்றியது.
பறவைக் கூடு
பறவைகளை
பறவைகள்
பறவை முட்டையை
பறவை முட்டை
உயிரை
உயிர்…
தள்ளாடும் மரக்கிளையில் அமர்ந்து
எல்லா சரிவுகளுக்குப் பின்னும் உள்ள
ஆதியொலியை
இறுகப் பிடித்தது.
எங்கோ
உடலில் எங்கோ
எறும்பு கடித்த எரிச்சல்
ஆனால், எறும்பு எங்கே போனது?
நீண்ட தேடலுக்குப் பிறகு
எறும்பு கண்ணில் பட்டது.
அப்படியென்றால் உடல் எங்கே?
வலி மட்டும்
நித்தியத்தில் எங்கோ
தங்கிவிட்டது.
பிறந்த வீட்டில்
தலையில் முல்லைப்பூ சூடிக்கொண்டு
பிறந்த வீட்டைவிட்டு வெளியேறிப்
பதினைந்து வருடங்கள் ஆகிவிட்டன
யாருக்கும் சொல்லாமல்
அந்த வீட்டை அண்ணனுக்கு எழுதிக்கொடுத்த பிறகு
கடுத்த முகத்துடன்
வருடத்திற்கு ஒன்றோ இரண்டோ தடவை மட்டும்
அவசரகதியில் போயிருக்கிறேன்
மாற்றுத் துணிகளும் துவட்டும் துண்டும்
அமுக்கி வைத்து
நிறைந்திருக்கும் வயர்கூடையை
மாடிப்படியில்தான் திணித்து வைப்பேன்
வழக்கம் போல்,
இரவு குளித்துவிட்டு வந்து
கூச்சல் போடும் குழந்தைகளுக்கு
இரவுணவு பரிமாறத் தொடங்கும்
அவசர நேரத்தில்
கரண்டு போகும்
நான் இதுவரை பார்த்தேயிராத
துர்நாற்றம் பரப்பும்
அந்தச் சிறு வண்டு
அப்போது
சரியாக என் பின்கழுத்தில்
பறந்து வந்து உட்காரும்.
அம்மு தீபா: கேரள மாநிலம் பாலக்காடு மாவட்டம் பட்டாம்பியில் பிறந்தவர். விலங்கியலில் பட்டப்படிப்பும் மலையாளம், கேரள ஆய்வு ஆகியவற்றில் முதுநிலைக் கல்வியும் கற்றவர். ஓவியரும் ஆவார். ‘கரிங்குட்டி’, ‘இரிக்கப்பொறுதி’ ஆகிய இரண்டு கவிதைத் தொகுப்புகள் வெளிவந்துள்ளன.
மின்னஞ்சல்: csujachellappan2@gmail.com